Answer:
Ako Bilang Isang Mag-aaral
Ako bilang isang mag-aaral ay nagpupursigi na magkaroon ng bagong kaalaman. Nililinang ko ang aking talino at karunungan sa pamamagitan ng pag-aaral nang mabuti. Ako bilang isang mag-aaral ay masipag na pumapasok sa paaralan at nakikinig sa mga guro. Sinisikap ko ring tapusin ang mga takdang-aralin at binabalikan ang mga natapos nang aralin. Ako bilang isang mag-aaral ay nagsusumikap na makatapos upang makamit ang aking mga pangarap at makatulong sa mahal sa buhay at sa kapwa.
Ako bilang isang mag-aaral ay sumusunod sa payo ng mga nakatatanda. Iniiwasan ko ang mga masasamang bisyo na maaaring makasira ng aking edukasyon. Ginugugol ko rin ang aking oras sa mga makabuluhang bagay tulad ng pagbabasa ng mga aklat ng kaalaman at pagtuklas ng mga ideya o konsepto. Lumalawak rin ang aking pang-unawa sa pagiging bukas sa iba't ibang pananaw habang sinusubukang magkaroon ng sariling paniniwala at mapatatag ito.
Ako Bilang Isang Mag-aaral: Katangian ng Mabuting Mag-aaral
Bilang isang mag-aaral na sinisikap magtagumpay sa landas na tinatahak, narito pa ang ibang mga katangiang nais kong mahasa:
Rerespetuhin o igagalang ko ang paniniwala at karapatan ng ibang tao.
Tutulong rin ako sa pag-unlad ng kalikasan at iba pang nilalang.
Ituturo ko rin ang aking mga kaalaman sa iba sa pag-asang marami ang uunlad.
Magiging handa rin ako sa panahon ng pagsusulit o iba't ibang patimpalak na sasalihan.
Hahasain ko ang aking mga talento at ibabahagi rin ito sa iba.
Iiwasan ko ang pagiging makasarili at mayabang.
Mananatili akong mapagkumbaba at mabuting mag-aaral at tao.
Hindi ko hahayaan na ang grado ang magiging batayan ko sa uri ng pamumuhay na magkakaroon ako sa hinaharap. Bagkus ay magiging isa sa inspirasyon ko ito upang magpatuloy.