Answer:
राष्ट्रिय एकता दिवसको अवसरमा कोटी कोटी शुभकामना
कविता : म पृथ्वी
मेरी आमा .....!
कस्ले चिर्यो मैले जोडेको धर्ती?
कस्ले मेटायो एकताको बिन्दु ?
कहाँबाट आयो यो विखण्डन को हुरी ?
किन लुटियो माटोको अस्मिता ?
.......
मलाई सबै कुरा जान्ने मन छ !
मेरी धर्तीको चिरा चिरा मुटु
निको पार्ने मलम लगाउने मन छ
मेरो धर्ती टेक्ने मन छ !
कस्तो भयो होला .......
मेरो चार जात छत्तीस वर्णको फुलबारी
वर्षौँपछि तृप्त हुनेगरी हेर्ने मन छ !
......................................
कस्ले ढलायो मेरो सान र मान ?
कस्ले लोटायो मेरो स्वाभिमान ?
कहाँबाट आयो पूर्वको ज्योति छेक्ने कुहिरो ?
किन पल्टाइयो शक्तिको धरोहर ?
मलाई सबै कुरा जान्ने मन छ !
आमाको आँखाबाट बगेका सपनाका कोशी र कर्णाली
मोति बनाएर सजाउन.....
तिम्रो कोखमा पुनः जन्मिने मन छ !
तिम्रा बिलाएका आशाका इन्द्रधनुष सजाउन
उही पृथ्वी बनेर आउने मन छ !
नगर्ची .....!
तिमीले सिलाएको ममत्वको भोटो लगाएर
मनकामनाको मन्दिरमा शक्ति माग्ने मन छ !
मलाई चिमोटेर सुँघ्ने कमिलाहरू
मलाई ढलाएर घोडा चढ्ने उपियाँहरू
मेरो टाउको फुटाएर गिदी चुस्ने जुकाहरू
मेरो फुलबारीमा आगो लगाउने पापीहरु
सतर्क .........!
तिम्रो छायाँ समेत बटुलेर
ठिँगुरा कस्ने मन छ !
मेरो शान्त देश ......
मेरा सोझा सन्तानको आडमा बसेर
आमाको मुहारमा खुसी रोप्ने मन छ !
वर्षौँ भएछ टाढिएको .....
त्यसैले त स्याल र ब्वाँसाहरू राज गरिरहेछन्।
तिनलाई जंगल धपाएर
सन्तानको कटेरो जोगाउन .....
मलाई मेरो माटो टेक्ने मन छ
आमा तिम्रो मुहारमा खुसी रोप्ने मन छ !!!
धन्यवाद
